ئەمڕۆ سێشەممە، 12-10-2021 نرخی نەوتی خاوی برێنت و تێکساس بۆ یەکەمجار لە دوای چوار رۆژ لە بەرزبوونەوەی بەردەوام، دابەزی، ئەوەش وەک هێمایەک بۆ هێوربوونەوەی بازاڕی نەوت.
بەرەبەیانی ئەمڕۆ نرخی نەوتی برێنت 26 سەنت دابەزی و هەر بەرمیلێک بە 83 دۆلار و 39 سەنت مامەڵەی پێوەکرا. هەروەها نرخی نەوتی سووکی تێکساسی ئەمریکا 33 سەنت دابەزی و بە 80 دۆلار و 19 سەنت مامەڵەی پێوەکرا.
نرخەکانی نەوت رۆژی دووشەممە لە بەرزترین ئاستەکانی خۆیان لە چەند ساڵی رابردوودا مامەڵەیان پێوەکرا.
بەرزبوونەوەی نرخەکانی نەوت دوای ئەوە روویدا کە قەیرانی سووتەمەنی لە جیهاندا پەرەی سەندووە و هیچ هێمایەک نییە بۆ هێورکردنەوەی ئەو قەیرانە کە دەیان وڵاتی لە ئاستی جیهاندا نیگەرانکردووە.
بەراورد بە دوایین رۆژی مامەڵەکان لە هەفتەی رابردوو، نرخەکانی نەوت هێشتا بە رێژەی 4٪ بەرزبوونەتەوە. کرەیج ئێرلام، شرۆڤەکاری کۆمپانیای راوێژکاری ئواندا لەو بارەیەوە دەڵێت، بنەماکانی بازاڕی نەوت تا رادیەەکی زۆر بەهێزە و بە ئەگەری زۆرەوە نرخەکان بەردەوام دەبن لە بەرزبوونەوە.
ئێرلام دەشڵێت، ئەگەر دابەزین لە نرخی نەوت دەبینین ئەوە دابەزینێکی کاتییە و هیچ دوور نییە کە نرخی نەوتی سێ ژمارەیی ببینین، ئەوەش وەک ئاماژەیەک بۆ ئەوەی کە ئەگەری هەیە نرخی نەوت 100 دۆلار بۆ هەر بەرمیل تێپەڕێنێت.
لە هیندستان کەمبوونەوەی خەڵووز بووەتە هۆکار بۆ ئەوەی کێشەی کارەبا لە چەندین شاری گەورەی ئەو وڵاتە سەرهەڵبدات. هەروەها پێشبینی زستانی ساردی ئەمساڵ بووەتە هۆکار بۆ ئەوەی پێشبینی بکرێت کە خواست بۆ بەکارهێنانی نەوت لە چەند هەفتەی داهاتوودا تەنانەت زیاتر دەبێت. هەر ئەوەش بووەتە هۆکار کە ئەو سندووقانەی کە مامەڵەی نەوتی خاو دەکەن ژمارەی گرێبەستەکانی خۆیان بۆ کڕینی نەوتی خاو لە چەند مانگی داهاتوودا زیادبکەن.
بەرزبوونەوەی گشتیی نرخی نەوت بووەتە هاندەرێک بۆ ئەوەی کۆمپانیا نەوتییەکانی ئەمریکا سەکۆی نەوتیی زیاتر لە کێڵگەکانیان بخەنەکار و ئەم هەفتەیە پێنج سەکۆی نوێ لە ئەمریکا خراونەتەکار.
هەفتەی رابردوو وڵاتانی بەرهەمهێنەری نەوتی ئەندام لە هاوپەیمانیی ئۆپێک پڵەس بڕیاریان دا کە درێژە بە رێککەوتنێکی خۆیان بدەن و مانگانە 400 هەزار بەرمیل بە ئاستی بەرهەمهێنانی نەوتی رۆژانەی خۆیان زیادبکەن.
