ئەمڕۆی تیروپشکی قۆناخی 16ـی خولی یانە پاڵەوانەکانی ئەوروپا رادەکێشرێت، لەم قۆناخەدا چاوەڕێی رکابەرییەکی بەهێز دەکرێت، بەو پێیەی چەند یانەیەکی بەهێز بە دووەمی کۆمەڵەکەیان گەیشتوونەتە قۆناخەکە.
کاتژمێر 2:00ی دوای نیوەڕۆ لەشاری نیۆنی سویسرا، تیروپشکی قۆناخی شازدەی چامپیۆنزلیگ، بەئامادەبوونی نوێنەری یانە سەرکەوتووەکان ئەنجامدەدرێت.
لەم قۆناخەی پاڵەوانێتییەکەدا، چوار یانەی ئینگلیزی، سێ یانەی ئیسپانی، دوو یانەی ئیتاڵی، دوو یانەی پۆرتوگالی،دوو یانەی فەرەنسی، یانەیەکی ئەڵمانی، یانەیەکی هۆڵەندی، یانەیەکی نەمسایی سەرکەوتوون.
لە تیروپشکی قۆناخی شازدەی پاڵەوانێتییەکە دوو یانەی یەک وڵات بەریەک ناکەون، دوو یانەی یەک کۆمەڵە بەریەک ناکەون.
لەم وەرزەی خولی یانە پاڵەوانەکانی ئەوروپادا، یاسای تۆمارکردنی گۆڵ لە دەرەوەی یاریگەی خۆت هەڵگیراوە و کاری پێناکرێت، بۆیە ئەگەر یارییەک بە ئەنجام یەکسانبوو پەنادەبرێتە بەر کاتی زیادکرا و پاشانیش لێدانەکانی یەکلاکەرەوە.
یانەکانی قۆناخی 16ـی چامپیۆنزلیگ ( یەکەمی کۆمەڵەکان)
مانچێستەر سیتی
لیڤەرپوول
ئایاکس
ریال مەدرید
بایرن میونشن
مانچێستەر یونایتد
لیل
یوڤێنتوس
یانەکانی قۆناخی 16ـی چامپیۆنزلیگ ( دووەمی کۆمەڵەکان)
پاریس سانجێرمان
ئاتلێتیکۆ مەدرید
سپۆرتینگ لیشبۆنە
ئینتەرمیلان
بێنفیکا
ڤیاریال
رێدبوڵ سالزبۆرگ
چێڵسی
یارییەکانی چوونی قۆناخی 16ـی خولی یانە پاڵەوانەکانی ئەوروپا، لە رۆژانی 15-16-22-23ـی شوباتی 2022 بەڕێوەدەچن، یارییەکانی گەڕانەوەش لە رۆژانی 8-9-15-16ـی ئاداری 2022 بەڕێوەدەچن.
لە قۆناخی 16ـی چامپیۆنزلیگدا، یەکەمی کۆمەڵەکان لە یاریی چووندا لە دەرەوەی یاریگەی خۆیان یارییدەکەن.
