ئا : بێستون لەتیف – ئێستانیوز
پزیشکی دادی پارێزگای کرماشان رایگەیاند، لە نۆ مانگی کۆتایی ساڵی 2021دا 32 کرێکار بەهۆی رووداوەکانی کارەوە گیانیان لەدەستداوە و 473 کرێکاریش برینداربوون.لەمبارەیەوە سەلیم خانی، بەڕێوبەری پزیشکی دادی پارێزگای کرماشان رایگەیاند: نزیکەی نیوەی قوربانییانی رووداوەکانی کار، لە شوێنی بەرزەوە کەوتوونەتە خوارەوە، بە جۆرێک کە لە کۆی 32 کەس کە گیانیان لەدەستداوە، 19یان لە شوێنی بەرزەوە کەوتوونەتە خوارەوە.بە وتەی سەلیم خانی، بەرکەوتنی زەبر، کارەبا و سووتان هۆکارەکانی دیکەی گیانلەدەستدانی کرێکارانن لە کاتی کاردا ،بەپێی راپۆرتەكە، لەو ماوەیەدا ژنێک بە رووداوەکانی کار گیانی لەدەستداوە و پێنج ژنی دیکەش برینداربوون، هەموو قوربانییەکانی دیکەی رووداوەکانی کار پیاو بوون.بەپێی بڕیاری بەڕێوەبەرایەتیی کاری ئێران دەبێت خاوەن کارەکان کەلوپەلەکانی خۆپارێزی بۆ کرێکارەکان دابین بکەن، بەڵام زۆرجار خاوەن کارەکان پابەندیی ئەم بڕیارە نابن ،بەڕێوەبەرایەتیی کاریش دەڵێت، لە هەر شوێنێک خاوەن کارەکان پابەندی یاسای پاراستنی گیانی کرێکارەکان نەبن، سزا دەدرێن.
