ئەمینداری گشتیی وەزارەتی پێشمەرگە ڕایگەیاند، بەھۆی تەرخان نەکردنی بودجە لەلایەن وەزارەتی دارایی عێراقەوە تا ئێستا نەتوانراوە دوو لیوا ھاوبەشەکەی نێوان پێشمەرگە و سوپای عێراق دەستبەکار بن.
دوای چەند مانگێک لە بڕیاری پێکھێنانی دوو لیوای ھاوبەش لە نێوان وەزارەتی پێشمەرگە و سوپای عێراق بۆ پڕکردنەوەی بۆشایی ئەمنی لە ناوچە جێناکۆکەکان، تا ئێستا ئەو دوو لیوا دەستبەکار نەبوون.
لەبارەی ھۆکاری دەستبەکار نەبوونیان فەریق ڕوکن “جەبار یاوەر” ئەمینداری گشتیی وەزارەتی پێشمەرگە ڕاگەیاند، بەھۆی تەرخان نەکردنی بودجە لە لایەن وەزارەتی درایی عێراقەوە لیواکان دەستبەکارنەبوون.
وتیشی، وەزارەتی دارایی عێراق پێی ڕایگەیاندوون لە یاسای بودجەی ٢٠٢١دا بودجە بۆ پێکھێنانی لیوای نوێ تەرخان نەکراوە، بۆیە چاوەڕوان دەکرێت لە بودجەی ٢٠٢٢ بودجەی تایبەت بۆ مووچە و چەک و کەرەستەی سەربازی دابین بکرێت و دوای بەشداریکردنی خولێکی ھاوبەش لیواکان دەستبەکار بن
