مەزڵوم کۆبانێ دەڵێت، رژێمی سوریا تائێستاش تەنھا بیر لە چارەسەری سەربازیی دەکاتەوە، جەختیش دەکاتەوە کە لە سوریادا ھیچ بەرەیەکی ئۆپۆزسیۆنی نیشتیمانی یەکگرتوو نییە بۆ جێگرتنەوەی دەسەڵات.
مەزڵوم کۆبانێ، فەرماندەی گشتی ھێزەکانی سوریای دیموکرات لە پەیامێکی ڤیدیۆییدا کە ئاڕاستەی کۆنگرەی ئەنجومەنی سوریای دیموکراتی کرد، دوایین ھەڵوێستی خۆی لەسەر پرۆسەی سیاسی سوریا راگەیاند و ئاماژەی بەوەشکرد، لە رووداوەکانی ئەم دواییەی دێرەزوردا دەرکەوت کە رژێمی سوریا تائێستاش تەنھا بیر لە چارەسەری سەربازیی دەکاتەوە.
وتیشی، لەم کاتەدا ئۆپۆزسیۆنی سوریا بووەتە داردەستی وڵاتانی دەرەوە و لەناوخۆشدا کاریگەری نەماوە، بۆیە ئەرکی ئەنجومەنی سوریای دیموکراتە ریزەکانی ئۆپۆزسیۆنی سوریا لە ژێر چەترێکدا کۆبکاتەوە.
پەیوەست بە کاریگەری وڵاتانیش لەسەر رەوشی سوریا، فەرماندەکەی ھەسەدە ئاشکرایکرد، ھێزە نێودەوڵەتییەکان ھیچ بەرنامە و ئیرادەیەکی بەھێزیان نییە بۆ چارەسەری قەیرانی سوریا.
