16ی ئادار، ڕۆژی کۆمەڵکوژیی هەڵەبجەیە، ڕۆژێکی خەمناکە، ڕژێمی بەعس، 37 ساڵ پێش ئێستا لەم ڕۆژەدا، هەڵەبجەی بە خاک و خەڵکەوە، بە پیر و منداڵەوە، بە باخ و کانی و ژینگەی جوانەوە، بە بۆردومانی فڕۆکەی جەنگییەوە ژاراوی کرد، ژاراوی شۆڤێنیزمی عەرەبی، تێکەڵ بە ژاراوی سیانید و خەردەلی بەسەر هەڵەبجە باراند و پتر لە 10 هەزار مرۆڤی سڤیل شەهید و زامدار کرا.
کۆمەڵکوژیی هەڵەبجە، زامێکی بێ کۆتاییە و وەکوو بیرەوەرییەکی خەمناک لە ویژدانی گەلەكەمان دەمێنێتەوە، هەڵەبجە هێمای بەرەنگاربوونەوەی تاوانکاری و هاودەردیی نەتەوەییە، بۆ دەوڵەتی عێراق ماکی شەرمەزارییە.
دوای ئەوەی 37 ساڵ بەسەر ئەو تاوانکارییەدا تێپەڕ دەبێ، هێشتا تارمایی ترس لە مەرگی بەکۆمەڵ سایەی بەسەر هەڵەبجەوە ماوە، هێشتا هەڵەبجە بۆنی ژاراوی لێ دێ، هێشتا هەڵەبجە زامێکە و پێویستیی بە ساڕێژبوونە، بۆیە پێویستە لەئاستی ناوەخۆ و نێونەتەوەییەوە بەردەوام کار لەسەر ئەم کۆستە نەتەوەییە بکرێت.
ـ کار بکرێت بۆ ئەوەی حکومەتی عێراق لە بەرامبەر ئەم تاوانە، داوای لێبوردن لە گەلی کوردستان بکات و لە هەموو ڕوویەکەوە هەڵەبجە و خەڵکی هەڵەبجە قەرەبوو بکرێتەوە.
ـ کار بکرێت بۆ ئەوەی لە ئاستی نێونەتەوەییدا، تاوانی هەڵەبجە بە جینۆساید بناسرێ و لە 16ی ئاداردا، لە نێوەند و پایتەختە گرینگەکانی جیهان یادی هەڵەبجە بکرێتەوە.
ـ لە ئاستی نێوەخۆدا، جگە لە بەدەنگەوەچوونی داوا و پێویستییەکانی خەڵکی هەڵەبجە و نەهێشتنی ئاسەواری کیمیاباران، حکومڕانیەکی باش و دادپەروەرانە، زامنی ساڕێژبوونی زامی هەڵەبجە و قوربانیانی کارەساتەکان و گیانی هەموو شەهیدانی ڕێگای ڕزگاریی کوردستان دەکات.
سڵاو لە گیانی شەهیدانی هەڵەبجە.
سڵاو لە ویستی گەلەكەمان بۆ هاوهەڵوێستی و هاوپشتی نەتەوەیی.
مەکتەبی سیاسیی
حزبی زەحمەتكێشانی كوردستان
16ی ئاداری 2025
241 وشە، 1 خولەک کاتی خوێندنەوە.
