سەربازێكی توركیا لە ئیدلب كوژرا، ئەمە سێهەم سەربازی توركیایە لە ئیدلب كوژراوە لە ماوەی دوو هەفتەی رابردوودا بەهۆی هێرشێكەوە لە ریفی ئیدلب.
رووانگەی سووریا بۆ مافەكانی مرۆڤ بڵاویكردەوە لەسەرەتای ساڵی 2021وە تا نێوەڕاستی ئۆكتۆبەر زیاد لە 26 هێرش كراونەتەسەر سوپای توركیا لە سووریا لە رێگای بۆمب و مین و مووشەكەوە.
راشیگەیاند لە ئەنجامی ئەم هێرشانەدا 27 سەربازی توركیا كوژراون كە لەنێویاندا ئەفسەر هەن، هاوكات 72 سەربازی دیكەش بریندار بوون.
لە كۆی ئەم هێرشانەدا هێزە كوردییەكان و شانەكانیان لە ریفی باكوور و خۆرهەڵاتی حەلەب سێزدە هێرشیان ئەنجامداوە، بەهۆیەوە یازدە سەرباز كوژراون، 39ش بریندار بوون.
حەوت هێرشیش لەلایەن گرووپی چەكداری لایەنگرانی ئەبوبەكری سەدیقەوە بوون لە ئیدلب بەهۆیەوە نۆ سەرباز كوژران و هەژدەی دیكەش برینداربوون.
هێزەكانی سووریای دیموكراتیش 6 هێرشیان كردووە بەهۆیەوە 7 سەرباز كوژراون و شازدەی دیكە برینداربوون.
