بەبۆنەی 36 ساڵەی دامەزراندنی حزبی زەحمەتكێشانی كوردستان پارتی كرێكارانی كوردستان (پەكەكە) پەیامێكی پیرۆزبایی ئاراستەی حزبی زەحمەتكێشانی كوردستان كرد، ئەمەش دەقەكەیەتی:
بەڕێز، سەركردایەتی و ئەندامانی مەكتەبی سیاسی حزبی زەحمەتكێشانی كوردستان
لە 36مین ساڵیادی دامەزراندنی حزبی زەحمەتكێشانی كوردستاندا، لە سەر ناوی بەڕێوەبەرایەتی و ئەندامانی پارتی كرێكارانی كوردستان پیرۆزبایی گەرمی خۆمان ئاراستەی بەڕێزتان و هەموو بەڕێوەبەرو ئەندامان و لایەنگرانی حزبە تێكۆشەرەكەتان دەكەین و لەم یادە پیرۆزەدا سەری رێز و نەوازش بۆ شەهیدە سەربەرزەكان دادەنەوێنین.
هاوڕێیانی هێژا
هەروەكو دەزانن هەرێمی رۆژهەڵاتی ناوین بە گشتی و كوردستان بە تایبەتی بە قۆناخێكی زۆر هەستیارو چارەنووسساز دا تێپەڕ دەبێت كە ئەمە وەكو شەڕی جیهانی سێهەمیش پێناسە دەكرێت. لە جەرگەی ئەم شەڕو ململانێیەدا هێزە هەرێمی و نێودەوڵەتییەكان بە هەموو هێزو توانای خۆیانەوە لە هەوڵی ئەوەدان كە هەیمەنە و دەسەڵاتی خۆیان بە ئامرازی نوێ سیاسی و ئایدیۆلۆژی و ئابووری و سەربازی بە سەر گەلان، ژنان، و چینە چەوساوەكاندا زاڵ بكەن. بەڵام گەلانی هەرێمەكە، چین و توێژەكانی كۆمەڵگا و بە تایبەت ژنان ئەم پیلان و سیناریۆیانە وا بە ئاسانی پەسەند ناكەن و لەبەرامبەر دەسەڵات ووازی و هەژموونگەراییدا خۆڕاگری دەكەن. هەربۆیە ئەركی هەموو هێزە شۆڕشگێڕو دیموكراتییەكانی كوردستانە كە بتوانن ببنە ناونیشانی ئەم خۆڕاگرییە و بە تێكۆشان لە سەر بنەمانی یەكێتی نەتەوەیی داهاتوویەكی ئازاد و یەكسان بۆ گەلەكەمان دەستەبەر بكەن.
بەو بڕوایەی كە حزبی زەحمەتكێشانی كوردستان لەم قۆناخە هەستیارەی مێژوودا بتوانێت پێشەنگایەتی بۆ خەباتی ئازادی و دادپەروەری و دیموكراسی بكات، جارێكیتر 36 ساڵیادی دامەزراندنی حزبە تێكۆشەرەكەتان پیرۆز دەكەین و لە خەبات و تێكۆشاندا سەركەوتنتان بۆ بەئاوات دەخوازین.
لەگەڵ رێزدا
كۆمیتەی بەڕێوەبەری پارتی كرێكارانی كوردستان PKK
12.12.2.21
