ئێمەی عەرەب لەخۆرهەڵاتی ناوەڕاست دورترین کەسانێکین لە واقیع .
تۆسەیری ئێمەی عەرەب بکە ، بۆنمونە .پێش شەست ساڵ نیوەی فەلەستینیان پێداین ، بە گەرەنتی نێو دەوڵەتی .
ڕەتمانکردەوە .( گوتمان، نا…هەمومان دەوێ )
دواتر هەموو شتێکیان لێستاندین .
دوای نیو سەدە دانیشتین لوتکە عەرەبیەکانمان بەست ولەنەتەوە یەکگرتووەکان پاڕاینەوە بۆ گێڕانەوەی ئەو نیوە ، یەکەمە . جوان سەرنج بدە دوای ئەوە چی ڕویدا !
قەسەبخانەکانی ئەیلول لە ئۆردن .
شەڕی کاولکەری لوبنان .
بەزینی حوزەیران .
قودس بە عەباداندا .
ملیۆنان کوژراو و بێ باوک .
لە دامەزراندنی وڵاتەسەربەخۆکانمان تێشکاین و تا ئێستاش لەئاسمان بۆ هۆیەکان دەگەڕێین .
لە ماڵی خۆماندا بۆی ناگەڕێین .
تا کەی ؟
تاکەی لەئاست ڕاستیەکان خۆمان کوێر کەین ؟
تاکەی خەریکی دروستکردنی دوژمن بین ؟
باشە من پرسیارێکی دوور لەسیاسەت لەبارزانی و تاڵەبانی و مالیکی و سەدام دەکەم . بەڵام نزیک لە ویژدان .
لە هەر خاوەن ویژدانێک دەپاڕێمەوە پێش وەڵامدانەوە زۆر بەباشی لێی ورد بێتەوە.
با هەر عەرەبێک پێچەوانە وێنای بکات .
واتا با وایدانێ عەرەبەکان نەتەوەی دووەمن لە عێراق و کوردەکان نەتەوەی یەکەمن و ئەوە کوردەکانن ۱۸۰ هەزار عەرەبی ئاشتیخوازیان لە یەک ڕۆژدا لە حیللەو ڕومادی سەماوە ژێر گڵ خستووە.
با عەرەب وای وێنا بکات کە کوردەکان کەس و کاری ئەویان بە گازی کیمیاوی لەشرگات و شوێنەکانی تر ڕشاندووە .
باشە پەرچەکرداری هەرعەرەبێک چی دەبوو؟
با وەڵامەکە لێگەڕێین بۆ خاوەن ویژدان زیندووەکان و بێینە سەر واقیع .
دەوڵەتی عێراقی ڕوخا و دڕندەکانی عەرەب و موسوڵمانەکان هاتنەناو عێراقەوە . هەزاران شیشانی و فەلەستینی وسعودی و یەمەنی و سوری میسری و ئۆردونی و لیبی تونسی و جەزائیری و ئەفغانی و عەرەبی عێراقی شیعە و سوننە ، هاتن و خۆیان تەقاندەوە .
ئەرێ چەند کورد خۆیان تەقاندەوە؟
لەماوەی چل ساڵدا عێراق لەگەڵ کورد لەشەڕدا بوو .
بەغداو شارەکانی تر پڕ بوون لە هەزاران کوردی لایەنگری بارزانی .
ئایا تەقینەوەمان لە (مدینە الصدر ) و کەڕادە بینی ؟
ئایا ڕفاندن و کوشتن و خستنە ناو قەفەسمان بینی ؟
ئایا بینیمان لەناو بازاڕ گۆشت و خوێنی مروڤ تێکەڵ بە گۆشتی مانگاو تەماتەو سێو ببێ .
باشە بۆچی واز لەچێژ وەرگرتن لەگوڵی ناو باخچەکانمان بێنین ڕوبکەینە زبڵدان دروستکردن ؟
چیە وا بەدوای تێکدان و ڕوخاندندا دەگەڕێین ؟
باشە ئەمە ئەوە ناگەیەنێ کە هەموو جارێ ئێمە دەبینە قوربانی ساویلەکەییمان و دەمارگیری هۆزگەرایی دەوارنشنیمان .هەر بەتەنها بە وروژاندنی
هاها…..هاها …خوتی ها ….
نەوت ئێمەی تێک وپێک دا . نەوت ئێمەی ژەهراوی کرد . نەوت ئێمەی کوشت و گێژی کردین .
نەوتی زۆرو پێویستمان هەیە .
نەوتی بەسڕە و کوت و عەمارەو موسڵمان هەیە .
داهاتی بەنرخمان لە ڕمادی و دیالە هەیە.
سەرقاڵیان کردوین بەپرسی کوردستانەوە. تەواو خۆمان ماندوو کردووە .
خۆمان لێکهەڵوەشاندووە تا ئەو ڕادەیەی خۆمان لەبەردەم کێشەیەک بینییەوە ، کە هیچ بنەمایەکی مادی نیه ،جگە لە دواکەوتنی خۆمان .
باشە ئێمەی شیعەو سوننە چ سودێکمان لە پێداگری لەسەر یەک نیشتیمانی بینیوە کە نەمان توانیوە دایبمەزرێنین !
شتێکی پێکەنیناوی نیە کە ئێمە مامەڵەی پێ لە گەڵ مافی نەتەوەیی کورد دەکەین ، کە دژە لەگەڵ ئەو ئەرگۆمێنتانەی بەرگری پێ لە هەمان مافی نەتەوایەتی خۆمان دەکەین !
باشە شتێکی نامۆ نیە بۆ نمونە ئێمە سیاسەتی دیفاکتۆ و بە یەهودیکردنی قودس و دروستکردنی ئۆردوگا جولەکەنشینەکان و گۆڕینی دیمۆگڕافی ناوچە داگیرکراوە فەلەستینیە کان ڕەتدەکەینەوە کە ئیسڕائیل پێی ڕوبەڕومان دەبێتەوە ،لەکاتێکدا ئەو واقیعە پیرۆز دەکەین کە سەدام سەپاندویەتی بۆ بەعەرەب کردنی چەندین ناوچەی کورد نشین !
سەیر نیە داوای مافی چاڕەنوس و دامەزراندنی دەوڵەتی سەربەخۆ بۆ فەلەستینیەکان دەکەین ،کەچی تەنها باسکردنی مافی دیاریکردنی مافی چارەنوس بۆ کوردەکان بە تاوان و گوناهی گەورە دادەنرێ .
من پرسیار لەوانە دەکەم دژی فیدڕاڵی و مادەی ۱٤۰ وەستاون :
بۆچی ؟ ئەی جێگرەوە چیە ؟
باشە ئەو مەترسیە چیە کەمادەی ۱٤۰ دروستی دەکات ،لەکاتێکدا سەرکردایەتی کورد دەڵێ بەجێبەجێکردنی مادەی ۱٤۰ و دەستور لەناو عێراقی دیموکڕاسیدا دەمێنینەوە کە تیایدا سامانی نەوت بۆ هەمووان دەبێ .
باشتر نەبوو بۆ سیاسیەکانمان کۆنگرەیەک بۆ بارزانی ڕێکبخەن کە تیایدا هەڵوێستی خۆی ڕونبکاتەوەو وەک بەڵێن بەرامبەر هەمووان لێی وەر بگیرێ !
بۆچی مالیکی فێڵی لەوە کرد ؟
لە هەولێر بەڵێنی چی دابوو ؟
ئەگەر عێراقێکی فیدڕاڵیمان نەوێ کە بە هاوبەشی بەڕێوە ببردرێ ، ئەوا دوو چارەسەڕ هەن :
یان بگەڕێینەوە بۆ ئەو شەڕو پێکدادانە بێ سەرەو بەرەییە لەناوبەرەی کە هەموومان لەناو دەبا . یان ئەو چارەسەرە مەدەنی ترین و ئەقڵانیترینە ،کە ئەویش دانپیانانە بە کێشەی کوردی کە ئێمە دەسپێشخەری بکەین بۆ چارەسەرکردنی . بەمەش
(٤۰ )ملیۆن کورد بۆلای خۆمان ڕادەکێشین و دەیانکەین بەدۆستی خۆمان .
کوردستان ناچێتە سەر مەریخ . ئەو هەر لەشوێنی خۆی دەمێنێ و خەڵکەکەی پەنا نابەنە بەر ئیسڕائیل کە هیچ شتێک نیە پێکیانەوە ببەستێتەوه .
نە جوگڕافی و نە مێژوویی و نەئابوری .
بەڵکو لەگەڵ ئێمە دەبن کە لەتەکیان وەستاوین و یارمەتیمان داون بۆ بەدیهێنانی خەون و ئاوات و بوونی نەتەوەییان. ئەوکات دەبنە کارەکتەری ئاوەدانی و ئارامی لەناوچەکەدا بە هاوبەشی لەگەڵ ئێمەدا .چونکە بەرژەواندییان بە دۆسایەتی و پەیوەندی باشیان لەگەڵ ئێمه دەستەبەر دەبێ نەک بە دژایەتی ئێمە .
ئەزمونی مێژوو پێمان دەڵێ ، لەداهاتودا ئەوان تەقینەوەو خۆکوژمان بۆ نانێرن وەک برا عەرەب و موسوڵمانەکانمان کەبۆیان ناردین .
چونکە ئەوان هیچ کاتێ ئەوەیان نەکردووە.
چۆن ئەوە دەکەن کاتێک ئێمە پشتیوان و هاوکاریان بین ..
من دەزانم کە ئاوازم لەسەر ژێیەک ژەنیوە پێشتر نەبیستراوە ،لەناو ژاوە ژاو و هەراو هۆریای هاها ..هاها….ها
بەڵام ئێستاش دەڵێم ،دڵم ژان دەکا کاتێک
کردەوەکانی داعش لەموسڵ و کارەکانی سوپای بێ ئابڕوی ئیسڕائیل لە فەلەستین و کاولکاری لە سوریاو سوتانی ڕومادی و لێکهەڵوەشانی عێراق دەبینم .
سەرم سوڕدەمێنێ لەو خزمەتەی پێشکەشی ئیسڕائیلی دەکەین.
دەزانم من ئاوازێکی نەشازم لەناو تیپەکەدا .
بەڵام مێژوی عەرەبیمان فێری کردوین کە ئاوازی نەشازی ئەمڕۆمان سرودی نیشتیمانیمانە لەداهاتوودا .
دەزانم وشەکانم دەبنە وروژێنەری خەم
و پەژارە لەدڵی نەوەکانی داهاتودا .
هەروەک پەژارەی زۆرمان چەشت چونکە باپیرانمان نیوەی فەلەستینیان بۆ وەرنەگرتین و تا ئاوارەو پێخاوس کەوتین لەناوەڕاستی ڕێگادا .
لە ئەیلولی تاریک دەچینەدەرێ و دەچینەناو نیسانی تاریکتر . لەمیش دەچینە دەرەوە بۆ سێیەم .
تاکەی ئاوا بەردەوام بین هۆ ئاقڵمەندانی نەتەوە ؟؟؟؟
ــــــــــــــــــــــــــــــــــــــــــــــــــــــــ
نوسینی
د. محمد صالح الموسوی
وەرگێڕانی بۆ کوردی
عمر محمود
