گروپی هاککەری “عەدالەتی عەلی” هاککردنی کامێراکانی زیندانی قزڵحەساری کەرەجی ڕاگەیاند، ئەم گروپە پێشتریش کامێراکانی زیندانی ئێڤینی تارانی هاککردبو.
لە ماوەکانی ڕابردو، گروپی هاککەری “عەدالەتی عەلی”، کامێراکانی زیندانی ئێڤین و کەناڵەکانی ڕادیۆ و تەلەفزیۆنی ئێرانی هاککردبو، ئەمڕۆش، ڕایگەیاند کە کامێراکانی زیندانی قزڵحەساری کەرەجی هاککردوە.
لەگەڵ ڕاگەیاندنی ئەم هەواڵە، گروپە سایبێرییەکە، ڤیدیۆی کاتی هاککردنی زیندانەکەشی بڵاوکردوەتەوە و ڕایگەیاندوە: “کامێراکانی زیندانی قزڵحەسارمان هاککرد، تا زوڵم و سەرکوتەکانی دەسەڵات لە زیندانێکی ترسناکی دیکە ئاشکرا بکەین و نەهێڵین بشاردرێتەوە و دوبارە بێتەوە”.
ئەم گروپە ڕاشیگەیاندوە، کە دەستی گەیشتوە بە هەندێک بەڵگەی نهێنی لەسەر دەستگیرکراوەکانی خۆپیشاندانەکانی پایزی ساڵی 2019ی ئێران.
یەکێک لە بەڵگەکان، ناوی هەزار و 846 دەستگیرکراوی ئەو کاتەی تێدایە، کە سزای زیندانی لە یەک مانگ بۆ 10 ساڵیان بەسەردا سەپاوە، ژمارەیەکیشیان سزای قامچیلێدانیان بۆ دەرچوە.
گروپە هاککرییەکە، هاوینی ئەمساڵیش، کامێراکانی زیندانی ئێڤینی تارانی هاککردبو و شێوازەکانی ئەشکەنجەدانی زیندانیانی ئاشکراکردبو، لە ڕۆژانی ڕابردوش چەند کەناڵێکی ڕادیۆ تەلەفزیۆنی ئێرانی هاککرد و دروشمی دژی دەسەڵات بڵاوکردەوە.
