رێکخراوی هەنگاو بۆ مافەکانی مرۆڤ بڵاویکردەوە، لە رۆژێکدا لە شاری پاوەی رۆژهەڵاتی کوردستان حەوت کۆڵبەر دوای ئەوەی لەلایەن هێزە ئەمنییەکانەوە تەقەیان لێدەکرێت، لە شاخ کەوتونەتە خوارەوە و برینداربون.
رێکخراوی هەنگاو بۆ مافەکانی مرۆڤ لەدوایین راپۆرتی خۆیدا باسی لەوەشکردوە، ڕۆژی پێنجشەممەی رابردو سێ کۆڵبەر بە ناوەکانی دانا ڕەحمەتی خەڵکی جوانڕۆ، فەرەیدون یوزی و ڕەمەزان سابیری خەڵکی کامێران لە کاتی کۆڵبەری لە سنوری نەوسود بە تەقەی هێزە ئەمنییەکان بریندار بون.
ئاماژەی بەوەشکردوە، سێ کۆڵبەری دیکەش بە ناوەکانی محەمەد فەخری خەڵکی جوانڕۆ، دارا یوزی و هۆشەنگ کەریمی خەڵکی کامێران لە کاتێکدا لەلایەن هێزە چەکدارەکانەوە ڕاونراون و ویستویانە کە دەرباز بن بە هۆی هەڵدێران لە شاخ بە سەختی بریندار بون .
رێکخراوی هەنگاو بۆ مافەکانی مرۆڤ دەڵێت، کۆڵبەرێکی دیکەش بە ناوی عابید شەجەریان لە کاتی هەڵاتن چوەتە سەر تەلی دڕکدار و دەستی 18 تەقەڵی خواردوە، بەشێوەیەکی گشتیش لەم ماوەیەدا تەقەکردن لە کۆڵبەرەکان لە ناوچە سنورییەکانی نەوسود زیادی کردوە.
