پتر ژ 350 هزار داخوازكهرێن مافێ پهنابهریێ د سالا 2023 دا ل ئهلمانیا ههبووینه ب زێدهبوونا ب رێژهیا 51.1% ب ههڤبهركرن ل گهل سالا 2022 و حكومهتا ئهلمانیا هزر د هندهك رێكاران دا بۆ سنوورداركرنا كۆچبهریێ دكهت.
بابهتێ كۆچكرنێ بوویه ئێك ژ كێشهیان ل ئهلمانیا و ئۆلاف شۆلز شیرهتكارێ ئهلمانیا رویبروى ژمارهیهكا فشاران ژ ئوپوزیسیۆنێ ژ بۆ سنوورداركرنا كۆچبهریێ بوویه.
ل دویماهیا سالا بۆرى 2023، شیرهتكارێ ئهلمانیا ل گهل حاكمێن ههر 16 ویلایهتێن ئهلمانى ل سهر گرتنهبهرا هندهك رێكارێن توندتر ژ بۆ سنوورداركرنا گههشتنا رێژهیهكا مهزن یا كۆچبهران بۆ ئهلمانیا رێككهفتبوو.
ئۆفیسا فیدرالى یا ئهلمانى بۆ كۆچبهران و پهنابهران راگههاندیه “351 هزار و 915 داخوازكهرێن مافێ پهنابهریێ د سالا 2023 دا ل ئهلمانیا ههبووینه ب زێدهبوونا ب رێژهیا 51.1% ب ههڤبهركرن ل گهل سالا 2022”.
ديار ژى كریه “سووریا ل رێزا ئێكێ دهێت ل گۆرهى ژمارهیا پهنابهرێن وێ ل ئهلمانیا كو نزیكى 104 هزار و 561 سووریانه، توركیا ل رێزا دوێ دهێت ب نزیكى 62 هزار و 624 پهنابهرێن تورك و ئهفغانستان ل رێزا سیێ ب نزیكى 53 هزار و 582 پهنابهران دهێت”.
ههروهسا ئهلمانیا ههر ژ دهستپێكا شهڕێ رۆسیا و ئۆكراینا تا نوكه پتر ژ ملیۆن پهنابهرێن ئۆكراینى ڤهحهواندینه.
ل گۆرهى ئاژانسێن نووچهیان، حكومهتا ئهلمانیا بۆ سنوورداركرنا كۆچبهریێ هزر د بساناهیكرنا دیپۆرتكرنا كۆچبهرێن نههاتینه وهرگرتن دا دكهت.
gav
