بەڵێن عەبدولڵا: كارەساتی ئەنفال گەورەترین تراژیدیایە کە رژێمی بەعس دژ بە گەلی کورد ئەنجامی داوە بۆیە دەبێت بخرێتە نێو سیستەمی خوێندن.
بەڵێن عەبدولڵا سکرتێری حزبی زەحمەتکێشانی کوردستان لە میانەی بەشداریکردنی لە کۆڕێک کە دەزگای میدیایی ئێستانیوز بۆ نووسەر توێژەری بواری ئەنفال خەبات عەبدولڵا سازی کردبوو گوتی:
کارەساتی ئەنفال گەورەترین تراژیدیایە لە پاڵ کارەساتی دیکەی وەک کیمیابارانی ھەڵەبجە و راگواستنی فەیلییەکان و بارزانیەکان کە رژێمی بەعس بە پلان بە ئامانجی قڕکردنی کورد لە باشووری کوردستان ئەنجامیداوە، بۆیە زۆر گرنگە ئەو کارەساتە بە شێوەیەکی زانستی بخرێتە ناو سیستەمی خوێندنەوە، تا بە بەردەوامی نەوەی نوێ لەو کارەساتانە ئاگادار بکرێتەوە و بکرێتە گرەنتیەکیش تا جارێکی دیکە گەلی کوردستان ڕووبەڕووی ئەو کارەساتانە نەبێتەوە.
بەڵێن عەبدوڵڵا، لە درێژەی قسەکانی لەو کۆڕەدا گوتی:
ئەوەی وڵاتە سەردەستەکانی کوردستان لە پارچەکانی کوردستان پەێڕەوەی دەکەن درێژەدانە بەو سیاسەتە کە لەسەر بنەمای ئینکارکردنی مافەکانی گەلی کوردستان بیناکراوە بۆیە پێویست دەکات ھەموو لایەک بە ھۆشیاریەوە مامەڵە لەگەڵ پلانە مەترسیدارەکانی داگیرکەرانی کوردستان بکات.
